2 bus, nabansag

CANDON CITY – Dua manen a bus ti nabansag idi Oktubre 25 a nakabuongan ti sarming a tawa dagitoy.

Immuna a nabansag ti  Partas Bus, addaan body no. 82123 ken plate no. AWA-793 a minaneho ni Alvin Pucnid, residente iti San Francisco, Sudipen, La Union kabayatan nga agdaldaliasat iti Barangay Tablac iti nadakamat nga aldaw.

Agpaamianan a direksion ti lugan idi binansag dagiti tallo a lalaki a nakalugan iti motorsiklo a puon ti nakabuongan ti makannawan a sarming a tawa ti bus.

Nabato met laeng iti daytoy nga aldaw idiay Barangay San Juan ditoy a siudad ti Maria de Leon a minaneho ni Samuel Pagtama, 49, residente iti Magnuang, Batac, Ilocos Norte.

Agpaabagatan ti lugan idi binansag ti dua a lalaki a nakalugan iti motorsiklo a nakabuongan ti tallo a tawa ti lugan.

Naglibas dagiti suspek kalpasan ti insidente.#