2 CAFGU member, nakumpiskaan polis iti armas

SAN JUAN, Ilocos Sur – Dua a kameng ti CAFGU ti inaresto dagiti polis kalpasan a nakakumpiskada kadagiti paltog iti ikut dagitoy idi agsapa ti Hunio 4.

Sakbayna, bayat ti panagiyimplimentar dagiti polis iti Oplan Balik-Eskwela iti Barangay Bacsil, nakaawatda iti tawag nga adda armado a lallaki nga agwarangwarang iti  sakup ti Barangay Immayos Norte ditoy nga ili, partikular ti nagsapalan nga agturong iti Barangay Nagsupotan idi agarup alas 7:45 agsapa ti Hunio 4.

Nagturong ti alert team nga indauluan ni Police Inspector Benjamin S. Raquedan iti na-dakamat a lugar ket nasalamaanda a pagduaduaan ti garawda da Lerrypol Torda y Harmon, 31, naasawaan; ken ni Joey Torda y Harmon, naasawaan, mapapati a kameng ti CAFGU, ken agpada a residente iti Barangay Maratudo, Magsingal, Ilocos Sur.

Idi sinita dagiti polis dagiti dua, nakakumpiskada iti ikut ni Lerrypol iti cal. 45 pistol Llama Max1 nga addaan serial no. 07-04-20767-97 a nagkarga iti maysa a bala ken maysa a magasin nga addaan pito a bala; ken iti ikut ni Joey ti maysa a cal. mm Bodapest pistol nga addaan serial no. C3429 ken nagkarga iti maysa a bala, ken maysa a magasin nga addaan 14 a bala.

Inaresto dagiti polis dagiti suspek idi awan ti maipakitada a legal a dokumento para iti panagikut ken panagawitda kadagitoy.

Kasta met a mapapati a saan a naipalawag dagiti dua no ania ti gapu ti kaaddada iti nada-kamat a lugar.

Karaman nga impan dagiti polis iti police station ti lugan dagiti suspek a maysa nga asul a Honda XRM motorcycle nga awanan numero ti plakana.

Kanaig daytoy, naipaiman iti Opisina ti Provincial Prosecutor iti Vigan City dagiti rekord para iti pannakaipila ti kaso a panagsalungasing iti RA 8294 maikontra kadagiti dua a suspek.#