2 dati kameng ti NPA, nagsubli iti sidong ti gobierno

CABUGAO, Ilocos Sur – Pormal a nagsubli itay nabiit ti agassawa a dati a kameng ti New Peoples’ Arm iti ikub ti gobierno  babaen ti simple a seremonia nga inimatangan dagiti agtuturay iti probinsia ken ditoy nga ili,  dagiti kameng ti militar ken sumagmamano a kameng ti media.

Kinuna ti agassawa a dati a kameng ti NPA a nailinged iti nagan a Genie ken Arman, a pormal a simmukoda iti ikub ti gobierno para iti naan-anay a panagtalna ti panunotda ken panangabaruananda iti biag.

Segun iti agassawa, nupay nabayagen a limmaksidda a kas kameng ti NPA ngem gapu ta adda latta dagiti dati a kakaduada a mangbisbisita kadakuada, inkeddengda ti pormal a panagsublida iti sidong ti turay tapno agtalna ti panunotda ken mangabaruananda iti panagbiag.

Insuko pay dagiti dua ti saggaysada nga MI6.

Impatalged ni Singson a tumulong ti gobierno probinsial a mangited iti trabaho iti agassawa.

Indagadag pay ni Singson ti isusuko metten dagiti kameng ti NPA nga adda pay la iti kabambantayan ta madadaan ti gobierno probinsial a tumulong kadakuada para iti panangabaruanan ti panagbiagda.

Kinuna met ni Col. Desiderio Alava, Commanding Officer ti 81st IB, Philippine Army, a maipababaen iti debriefing dagiti agassawa ken tapno maammuan no ania nga affiliation wenno organisasion a nakaikappenganda sakbay a simminada iti bunggoy.

Segun met iti maysa pay nga opisial ti 81st Infantry Batallion, babaen ti gun for hire a programa ti militar, adda katimbeng a gatad dagiti naisuko nga armas a maited nga aramaten dagiti agassawa iti panangabaruananda iti biag.

Segun iti maysa a turayen, iti Cabugao ti napili dagiti agassawa a simmukuan agsipud ta adda aksesda kadagiti agtuturay ditoy ket nataltalged ti riknada iti isusukoda nga agsubli iti sidong ti gobierno.

Iti sabali a bangir, impalgak ni Mayor Edgardo S. Cobangbang, Jr. a naidanon iti imatangna ti isusuko dagiti agassawa babaen ti maysa a gayyemna a nangiyam-ammo kadagiti agassawa kenkuana.

“…Nakitada siguro ti dakkel a nagbaliwan ti sosiedadtayo, isu a naay-ayoda a nagsubli iti sidong ti gobiernotayo,” kinuna ni Cobangbang idinto nga innayonna a “napintas a partisipasionna” ti  pannakataliawda kenkuana a rangtay iti isusuko dagiti agassawa.

“Ngem desision dagiti agassawa ti isusukoda, kas met idi nagdesisionda a simmurot iti underground movement,” inyunay-unay ni Cobangbang.#