2 drayber napakatan iti drug bust operation

BANTAY, Ilocos Sur – Dua a drayber ti nanabtuog iti ima ti nagtitipon nga elemento ti kapolisan a nangisayangkat iti buy bust operation maikontra kadagiti suspek iti Barangay San Julian Centro ditoy nga ili idi aldaw ti Hunio 24.

Inaresto dagiti nagtitipon nga elemento ti Bantay police station; IS PAIDSOTG; PIB; PDEA, ISSET; CIDG, Bulag, Bantay, Ilocos Sur nga indauluan ni Police Inspector Edmund Sarmiento Artates iti babaen ti direkta a superbision ni OIC Provincial Director, Police Supt. Nestor Eswagen Felix ni Robert Raguini y Parada, 41, minibus driver, residente iti Barangay San Julian Centro, Bantay, Ilocos Sur kalpasan a nasamsam iti ikutna dagiti plastic sachet a naglaon iti mapapati a shabu ken drug paraphernalia.

Malaksid iti small heat sealed plastic sachet a nagkarga iti mapapati a shabu a ginatang ti poseur ken ni Raguini, nakasamsam pay dagiti polis iti ikutna iti 6 a plastic sachet a nagkarga iti mapapati a shabu, 5 a naluktan a plastic sachet a naglaon iti mapapati a shabu residue, ken drug paraphernalia a pakaibilangan iti 5 a lighter, 19 a narolio nga aluminum nga addaan iti mapapati a shabu residue, 2 narolio nga aluminum foil nga addaan iti residue, maysa a getteng, plastic small box, pencil box, plastic scope ken P500.00 marked money a nausar a pinanggatang iti droga.

Nainbitaran met iti police station ni Relly Cabanit y Andallo, 39, naasawaan, PUV driver ken residente iti Barangay Villa Mercedes, San Quintin, Abra, a nairana a presente iti uneg ti kuarto ni Raguini idi inwayat dagiti polis ti drug operation.

Iti pannakaisurat daytoy, maisagsaganan ti kaso a panaglabsing iti Sections 5, 6, 11 ken 12 ti Article 2 iti RA 9165 maikontra kadagiti suspek.

Kabayatanna, dua pay a pagtaengan iti Sto. Domingo, San Juan, ken Burgos ti sinukisok ti kapolisan a nagresulta iti pannakakumpiskada kadagiti mapapati a droga ken drug paraphernalia ken pannakaaresto dagiti bumalay.

Nainaganan dagiti suspek a da Jorel Bumatay y Avila, 48; ken Jojo Castillo y Viloria, 30, residente iti Barangay Resurrecion, San Juan.

Malaksid kadagiti plastic sachet a naglaon iti mapapati a shabu ken drug paraphernalia, nakasamsam pay dagiti polis iti balay ni Bumatay iti lima a bala ti cal. 45, 21 a kapsula iti cal. 9MM ken maysa nga aksesoria iti paltog (stabilizer).

Nakasukain met dagiti polis iti balay ni Castillo iti uppat a heat sealed plastic sachet a nagalon iti mapapati a shabu, dua a bala ti G12 ken maysa a bala ti 9MM.

Naibentario dagiti nasamsam a masuspetsa a droga ken paraphernalia iti imatang dagiti barangay officials, kameng ti DOJ ken media representative.#