2 drug pusher, naipiskot dagiti polis

CABUGAO, Ilocos Sur – Dua a lalaki a pakairamanan ti maysa a puntiria ti warrant of arrest nga inyisio ti maysa a hues, ti naipiskot dagiti polis bayat ti mapapati a panagitulakda iti maiparparit a droga sadiay Barangay Pug-os ditoy nga ili idi tengnga ti aldaw ti Disiembre 16.

Pinadas da Ryan Tubon y Tabudlo, 30, naasawaan, ken residente iti nadakamat a barangay, ken ti kaduana a nainaganan Jerwin Inofenada y Rodrigo, 23, naasawaan, ken residente iti Sitio Cobocob, Barangay Carusipan, a libasan dagiti polis ngem kinamatda ida dagiti pannakabagi ti linteg agingga a  naipiskotda iti uneg ti balay ti maysa nga agnagan Evelyn Ibatuan a nagpaknianda.

Segun ken ni Chief Inspector William N. Nerona, hepe ti polis ditoy, nakakumpiskada iti ikut ni Inofenada iti maysa a coin purse, maysa a bassit a heat sealed plastic sachet a mapapati a naglaon iti shabu, pito a babassit a plastic sachet nga awan naggianda, ken maysa nga improvised scoop a naaramid iti straw.

Nakumpiskada met iti ikut ni Tubon ti maysa a bassit a pouch, bassit nga improvised toother a naglaon iti maysa a bassit a heat sealed plastic sachet a naglaon iti mapapati a shabu, maysa nga improvised toother a naglaon iti napagango a marihuana, ken assorted sachets.

Adda imet dagiti polis a warrant of arrest ni Tubon a pinirmaan ni Judge Nida Bringas Alejandro ti RTC Branch 24, Cabugao a napetsaan iti Disiembre 9, 2013 gapu iti panaglabsingna iti Section 11 ken 12 ti RA 9165 babaen ti Criminal Cases No. 3047-K ken 3048-K.

Naitimbre ti kaadda ni Tubon iti Barangay Pug-os babaen ti maysa a tawag iti selpon a naawat ti police station  manipud iti barangay intelligence networkda.#