2 drug pushers, nanabtuog iti buy bust operations

GALIMUYOD, Ilocos SurDua a drug pusher ti napalab-ogan iti nagsina a buy bust operation nga inwayat ti kapolisan ti Tagudin ken ditoy a police station itay lawasna.

Immuna a nanabtuog iti ima ti kapolisan ti Tagudin ken PDEA ISSET ni Rufino Randy Dela Cruz Ramirez, 37, naasawaan, ken residente iti Barangay Dardarat idi agarup 12:30 ti parbangon ti Agosto 29, sa ni Orlan Espanto y Lucena, 398, awanan asawa, beautician ken residente iti Barangay Kilang, Galimuyod, Ilocos Sur.

Ginammatan dagiti polis ni Dela Cruz kalpasan nga inyawat daytoy ti maysa a plastic sachet a naglaon iti mapapati a shabu iti nagpammarang a poseur/buyer.

Nakumpiska pay dagiti operatiba manipud iti suspek ti P1,000.00 a naaramat iti buy-bust operation, nausar a bassit a plastic sachet a nagkarga iti masuspetsa a shabu residue, 9 nga aluminum foil strips a nagkarga iti mapapati a shabu residue ken maysa a selpon.

Iti sabali a bangir, am-ammon ni Espanto nga agilaklako iti shabu iti Galimuyod ken kaparangetna nga ili. Ket idi agarup 6:45 ti malem ti Agosto 30, pinakatan dagiti polis iti buy operation sadiay Barangay Mabayag, Galimuyod, Ilocos Sur a nagresulta iti pannakaaresto ti suspek.

Malaksid a napasublida ti marked money a nausar iti operasion, nakakumpiska pay dagiti polis iti ikut ni Espanto iti maysa a heat-sealed plastic sachet a nagkarga iti mapapati a shabu, tallo nga strip ti aluminum foil a nagkarga iti mapapati a shabu residue, dua a disposable lighter, selpon, ken sensilio iti nadumaduma a denominasion.

Iti pannakaisurat daytoy, naipaiman ti kaso dagiti dua iti piskalia.#