2 drug pushers, natiliw iti buy bust operation

BANTAY, Ilocos Sur – Dua a tao ti inaresto ti kapolisan ditoy nga ili kalpasan a positibo ti buy bust operation nga insayangkatda idi Mayo 17 ken 18.

Nanabtuog da Eric Pablico y Doque, 35, naasawaan, ken residente iti Sitio Padron, Barangay Tay-ac, Bantay ken ni Dharyle Ayson y Fieldad, 16, awanan asawa, ken residente iti San Julian Sur, Vigan City iti nagsaruno a buy bust operation nga insayangkat ti kapolisan idi sardam ti Mayo 17 ken 18. Iti asideg ti barangay hall ti Naguiddayan ti nakatiliwan ni Pablico idinto nga iti sanguanan ti Highway Software Hub Internet Cafe ken ni Ayson.

Nakakumpiska dagiti polis iti ikut ni Pablico iti maysa a  heat sealed plastic sachet  a nagkarga iti masuspetsa a shabu, maysa a paris ti getteng, selpon a Samsung, ken P1,000.00 marked money a naaramat iti transaksion.

Nakakumpiska dagiti kameng ti ISPAIDSOTG, Intel Ilocos Sur PPO ken ti Bantay police iti ikut ni Ayson iti dua a bassit a heat sealed plastic sachet a naglaon iti mapapati a shabu, maysa a Myphone a selpon, maysa a P500.00 a naaramat iti operasion ken P950.00 iti nadumaduma a denominasion.

Naipatuloden iti opisina ti provincial prosecutor ti Vigan City ti kaso a panaglabsing iti Section 5, 11 ken 12 ti RA 9165 maikontra ken ni Pablico.#