2 drug pushers, natiliw iti buy bust operation

SAN JUAN, Ilocos Sur – Parke a pagay-ayaman dagiti ubbing sadiay Barangay Lira ditoy nga ili ti napili dagitoy dua a babbaro a paglakuan iti maiparparit a droga ngem nanabtuogda iti ima dagiti pannakabagi ti linteg babaen ti maysa a buy bust operation nga insayangkat dagitoy idi malem ti Disiembre 11.

Balligi ti insayangkat a buy bust operation dagiti polis-San Juan iti panangidaulo ni Police Inspector Benjamin Sevillena Raqueda iti babaen ti direkta a superbision ni PSSupt. Noel Baguitan Amoyen ken ti PDEA Regional Office 1 iti Children’s Park a masarakan iti amianan ti St. John the Baptist Church, Barangay Lira, San Juan idi agarup 4:35 ti malem ti Disiembre 11 a nagtungpal iti pannakatiliw da Rosauro dela Cruz y Lucero, 24, baro, ken residente iti Barangay Lira, San Juan ken Rexon Quilala y Villarin, 26, baro, ken residente iti Barangay Bannuar.

Nakumpiska iti ikut ni dela Cruz ti tallo a sag-P500.00 a marked money nga addaan serial numbers a YF750393, HD082324 ken CS081987, maysa a plastic sachet a nagkarga iti mapapati a shabu, maysa a Nokia cellphone, ken maysa a cricket lighter.

Naipila ti kaso a panaglabsing iti RA 9165 maikontra kada dela C ruz ken Quilala iti provincial prosecutor’s office, Vigan City a nai-docket babaen ti NPS # I-03-INV-12L-00144.#