2 drug pushers, natiliw nagsina a buy-bust operation

NARVACAN, Ilocos Sur – Dua a masipsiputan a drug pusher ti nanabtuog iti nagsina a buy bust operation nga inwayat ti kapolisan sadiay Galimuyod ken iti Narvacan itay lawasna.

Inaresto dagiti polis-Narvacan ni Jayson Nazal y Ramos, 35, naasawaan, tricycle driver, ken residente iti Sitio Riverside, Barangay San Jose, kalpasan a nagpositibo ti  inwayatda nga operasion maikontra iti suspek iti Barangay Bulanos, partikular iti Villa Gloria Beach Resort idi agarup 2:30 ti malem ti Nobiembre 17.

Nakumpiska iti ikut ni Nazal ti maysa a heat-sealed plastic sachet a nagkarga iti mapapati a shabu a naikabil iti uneg ti match box;  marked money a  P500.00 nga addaan serial number WQ703341; 6 a sag-P20.00; maysa a P100.00 ken maysa a blue heat-sealed plastic sachet  a nagkarga iti mapapati a shabu.

Nainbentario dagiti nakumpiska nga items iti sanguanan dagiti barangay officials ti Bulanos ken kameng ti media sada naipan iti police station para iti umisu a disposision.

Kabayatanna, iti sabali a buy-bust operation nga inwayat ti nagtitipon a kapolisan a pakairamanan ti Galimuyod police station, PDEA ISSET, pib ken paidg ti ISUR PPO babaen ti koordinasion ti PDEA RO1 sadiay Barangay Sacaang, Galimuyod, nakakumpiskada iti ikut ni Fredelson Alipda y Quiyan, 46, naasawaan, mannalon, ken residente iti Barangay Bugnay, Candon City iti mapapati a shabu ken drug paraphernalia.

Malaksid iti P500.00 a nausar a buy-bust money,  nakakumpiska dagiti operatiba iti maysa a bassit a heat-sealed plastic sachet a naglaon iti mapapati a shabu; aluminum foil; ken dua a selpon.

Kas maibatay iti report, maysa a drug pusher/peddler iti shabu ni Alipda nga agop-operar iti ili ti Galimuyod ken dagiti kabangibangna a munisipalidad ken maikawalo iti drug watch list ti Candon City police station.

Iti pannakaisurat daytoy, maisagsaganan ti kaso maikontra ken ni Alipda.#