2 ektaria a plantasion ti marihuana, rinaut dagiti polis

ALILEM, Ilocos Sur – Naaramid ti ceremonial burning ditoy ti sumagmamano kareppet a marihuana a karaman kadagiti napag-ot iti maysa a plantasion a rinaut dagiti polis iti nagbeddengan ti Benguet ken Ilocos Sur itay nabiit.

Rinaut dagiti nagtitipon a bunggoy dagiti polis ti maysa a plantasion ti marihuana iti nagbeddengan ti Bakun, Benguet ken Amilongan, ditoy nga ili ket pinag-otda dagiti mula a mapattapatta nga agpated iti P90 million.

Pinag-ot ti nagkaysa a puersa ti RID, RMG 1, Police Provincial Office, PDEA 1 ken ti Alilem PNP ti  agarup 320,000 a pinuon ti marijuana iti aganay dua nga ektaria a plantasion iti nasao a pagbeddengan ti Benguet ken Ilocos Sur.#