MAGSINGAL, Ilocos Sur – Dua nga estudiante a babbai ti inyanud ti layus a nakalmesan ti maysa bayat ti panagawidda manipud iti pagadalanda sadiay Sitio Quinang, Barangay Maas-asin ditoy nga ili idi malem ti Septiembre 20.

Saanen a naidanon iti Magsingal District Hospital a sibibiag ni   Fredalyn Recitis y Ullero, 12, estudiante ti Magsingal Institute ken residente iti nadakamat a barangay. Nataming met iti  nadakamat met laeng nga ospital ni Rachelle Tabunar y Ullero, 18, balasang, estudiante iti University of Northern Philippines.

Segun iti polis, aggawiden dagiti dua manipud iti eskuelada ngem naranaanda ti pannakalayus ti dalanda iti kaltaltalonan iti Sitio Quinang ket naiyagusda.

Saan a nadakamat ti report no kasano a naalaw ni Tabunar.#