2 grupo, nagrambol

SANTIAGO, Ilocos Sur-  Lima a tattao ti nasugatan idi kinibor ti maysa a grupo dagiti lallaki ti sabali a grupo bayat ti maysa a family reunion ken birthday party iti barangay Sabangan iti daytoy nga ili.

Nasugatan ni Adrian Arola, 31, residente iti Carcarabasa, Lidlidda, Ilocos Sur idinto a nasugatan da Billy Cadungonan, Florencio Bangan, Brinton Aglango ken Alejo Arola.

Segun iti report, nagturong da Arola iti Sabangan tapno rambakanda ti family reunionda ket nagkakantada babaen ti inabanganda a videoke. Ngem simmangpet ni Alex Omaoeng, residente ti Barangay Bugnay, Candon City, ken ti grupona ket kayatda ti agkanta. Saan nga impalubos da Arola ket daytoy ti puon ti nagsubangan ken nagdinnanoganda ken ni Omaoeng.

Mapapati a nangala ni Omaoeng iti buneng ket  tinagbatna ni Adrian a nakasugatan ti barukong, ulo ken ramay daytoy.  Nasugatan met ti mata ni Cadungonan gapu iti naibato kenkuana a bote ti serbesa.

Naipan dagiti nadunor iti Candon General Hospital tapno maagasanda.

Mapapati a nabartek ti grupo ni Omaoeng.#