2 incumbent mayors, insanudda kandidaturada

CABUGAO, Ilocos Sur – Dua nga incumbent mayors ti nangisanud iti kandidaturada ket naisandi kadakuada ti anakda babaen ti substitution ti Commission on Elections idi Disiembre 10.

Kas impakaammonan iti napalabas, pormal nga insanud ni Mayor Germie Singson-Goulart ti kandidaturana a para mayor iti Caoayan iti eleksion inton Mayo 2016.

Maipalagip a kalpasan ti panagipila ni Goulart iti kandidaturana a para mayor, impila met ti anakna a ni Paulo Singson Goulart ti kandidaturana a para met laeng iti kinamayor iti Caoayan iti maudi nga aldaw a panagipila iti COC.

Kas panangilawlawag ni Goulart, ipasublatna pay iti anakna a mangiggem iti turay iti Caoayan agsipud ta masirmatana a saan nga umdas ti sumaruno a tallo a tawen tapno maiyimplimentarna dagiti nagkaadu a plano ken programana para iti panagdur-as iti Caoayan.

No nagtuloy ti mayora nga agkandidato, maudi a terminona koma iti masungad nga eleksion.

Awan ti kasango ni Goulart a para mayor ngem para iti kinabise mayor, agsango da incumbent Vice Mayor Pedro Belarmino ken agdama a Konsehal Freddie Querubin.

Kabayatanna, iti met Cabugao, inakkal ni Mayor Edgardo S. Cobangbang, Jr. ti kandidaturana a para mayor ket ti anakna a ni George Edward Cobangbang ti nangsukat kenkuana nga standard bearer para mayor iti babaen ti Nationalist People’s Coalition (NPC).

Maikadua nga anak ni Mayor Cobangbang, nagturpos ti ub-ubing a Cobangbang iti Business Administration, major in business management iti De La Salle University idi 2014.

Kasango ni Cobangbang a para mayor ni Dr. Rudy Singson, dati a medical officer iti Cabugao.

Unopposed ti katiket ni Mayor Cobangbang, ni pailayon a Vice Mayor Deogracias Jose Savellano, anak ni agdama a Vice Governor Deogracias Victor Savellano.

Agkandidato ti laklakay a Savellano para diputado a mangibagi iti umuna a distrito ti Ilocos Sur ket kasangona ni Bokal Christian Purisima.#