2 Indian national, naiyospital gapu iti aksidente

BANTAY, Ilocos Sur – Naiyospital ti dua nga Indian national gapu iti pannakaatalda iti naputed a sanga ti mangga iti national highway sadiay Bulag ditoy nga ili idi Enero 10.

Nabigbig dagiti biktima a da Paramdeep Singh, 25, baro, residente iti San Jose, Candon City, ken ni Inderjit Singh, 52, naasawaan, ken aggigian iti Pardos Apartment, Buquig, Bantay, Ilocos Sur.

Segun iti polis, agpadaya a direksion ti Yamaha Sniper a minaneho ni Paramdeep ket idi makadanonda iti Bulag, naatalanda ti sanga ti mangga a pinukan ni Gavino Domenden y Obrero, 67, a gapu iti pannakatuang ti lugan agraman dagiti naglugan ken nakairamanan met a nakadunoran ni Domenden.

Naitaray dagiti tallo iti Gabriela Silang General Hospital, Vigan City para iti pannakaagasda.#