2-kadsaaran a balay, nauram

CAOAYAN, Ilocos Sur – Nauram ti maysa a balay iti Barangay Fuerte ditoy nga ili idi aldaw ti Hunio 20 ket karaman a dimmapo dagiti sanikua a mapattapatta nga agbalor amin iti nasurok a maysa a milion.

Nupay saan a nauram amin ti dua kadsaaran a balay ni Juanita Quelnan y Quindoy, 85, balo, mapattapatta nga agpateg iti P1.5 milion ti pateg dagiti sanikua a nadadael.

Segun iti anak ni Juanita a ni Danilo, 49, naasawaan ken residente met laeng iti nadakamat a lugar, adda nangegna a bimtak iti maikadua a kadsaaran ti balay ket idi napanna kitaen, immasuken ti circuit breaker.

Mapapati a nagtaud ti uram iti panagshort circuit ti elektrisidad maigapu iti overloaded a convenient outlet.#