Footer

2 kadua ti biktima sakbay natay, pinagsaludsodan dagiti polis

VIGAN CITY – Dua a lallaki a mapapati a kadua ti biktima sakbay ti pannakapapatayna ti pinagsaludsodan ti polis a mangted lawag iti nasao a krimen.

Kinuna ni  Police Supt. Jugith del Prado, OIC ditoy, a boluntario nga insubmite ti dua a dina innaganan a tattao ti inaruatda a bado idi karabian a napasamak ti pammapatay ket naipatuloden dagitoy iti crime lab iti rehion tapno maamirisda no adda kimpet a dara ken maikumparada iti dara a naala dagiti inbestigador ti SOCO iti crime scene.

Nangted pay iti buok dagiti nadakamat a tattao, segun ken ni del Prado.

“No adda kimpet a dara iti bado, maammuanto no pumada iti dara ti biktima,” nakuna ni del Prado. Nupay kasta, kinuna ti hepe a nalabaanen dagiti bado  ken dina masigurado no adda kimpet a dara.

Inyunay-unay pay ni del Prado a saanda nga ibilang dagiti napagsaludsodan a suspek iti pannakapapatay ni Cesar Espanto Centeno, 54, ken residente iti Barangay IV, a naduktalan ti kabsatna a babai a maysan a bangkay iti uneg ti kuartona idi aldaw ti Hulio 22.

Inreport ni Cely Centeno Borje, 61, iti polis a naduktalanna a natayen a nakapakleb ti kabsatna a ni Cesar Espanto y Centeno, 54, awanan asawa, iti uneg iti kuartona idi mapanna kitaen daytoy iti agarup alas dose iti nadakamat nga aldaw.

Kinuna ni Cely a naggawidda nga agkakabbalay a pakairamanan ti biktima idi agarup alas dies ti rabii ti Hulio 21 manipud iti tartarawidwidanda a computer shop ngem saan metten a rimmuar ni Cesar iti kabigatanna isu a napanna kinita ket nadatnganna laengen a natayen daytoy.

Kinumpirmaran ni del Prado a kas maibatay ti autopsia ken ni Centeno, nagsagrap daytoy iti bagsol iti barukongna a puon ti impatayna.

Segun iti kabbalay ti biktima, mapukpukaw ti maysa a bag a naggianan ti selpon, ATM card, kuarta a di pay ammo ti dagupda, ken dadduma pay a personal a gamit ti biktima.

Rimmuar iti inisial nga inbestigasion ti polis a nakalukat ti steel gate ken saan a nailock ti door knob, naka-on ti telebision ken ti bentilador, ken awan ti pakakitaan iti struggle iti uneg ti kuarto.#