TAGUDIN, Ilocos Sur – Nayospital ti dua a tao kalpasan a nasapgid ti luganda ti maysa a truck iti national highway a sakup ti Barangay Libtong ditoy nga ili iti bigat ti Mayo 25.
Nadunor ti kanawan a tumeng ni Sgt. Arnel Roque, 45, naasawaan, kameng ti Army a nakabase iti Gamu, Isabela ken natukkol ti kannawan a luppona ni Cpl. Joel Tema, 33, naasawaan, Army member, residente iti Barangay Bolanao, Tabuk, Kalinga, idinto a nadadael ti luganda.
Segun iti report, agdaldaliasat ti Toyota Ace van a minaneho ni Roque iti agarup alas 6:45 ti bigat ti Mayo 25 iti kalsada nasional iti nadakamat a barangay idi masapgidna ti nakaparking a Izuzu trailer truck a puon ti nakadunoran dagiti biktima.
Naitaray dagiti dua iti Tagudin General Hospital sa naiyalis ni Tema iti San Fernando City tapno mataming ti dunorna.#