2 kameng ti grupo dagiti agtaktakaw iti motorsiklo, tiniliw dagiti polis

VIGAN CITY –Ā  Ibilang dagiti polis ditoy a natukkolen ti maysa a grupo dagiti agtaktakaw iti motorsiklo iti pannakatiliw ti dua a suspekĀ  iti ili ti Sto. Domingo idi Abril 9.

Inaresto dagiti polis Sto. Domingo da John Rey Reotutar y Plastina, 18, awanan panggedan, ken residente iti Barangay Poblacion ken Rodrigo Lazo y Gamurot, 16, out of school youth, ken residente iti Barangay Nalasin, kalpasan a narekobre kadakuada ti maysa a motorsiklo a mapapati a tinakawda iti Barangay Pantay Daya, ditoy siudad idi sardam ti Abril 3.

Bayat ti follow-up investigation nga insayangkat dagiti polis ti Sto. Domingo, narekobreda ti maysa a nalabusan a Mio motorcycle, addaan chassis no. PA01CV0007583 ken engine/motor no. ICV-008688 iti balay ni Lazo ken plastic covers a maris kiaw ken puraw ken dadduma pay nga aksesoria iti balay ni Reotutar.

Natakaw ti nasao a motorsiklo a kukua ni MC Neil Supnet y Alit, 22, baro, ken residente iti Barangay Cabaroan, Vigan City idi agarup 7:30 ti sardam iti Barangay Daya, Vigan City.

Iti reportna iti polis-Vigan, kinuna ni Supnet a pinasiarna iti dayta a sardam ti kalib-inna ket imparkingnaĀ  ti Yamaha Mio Soul a motorsiklona iti sanguanan ti Galaxy Lumber and Hardware iti nasao a barangay ngem nalipatanna ti tulbek a nakatunnal iti ignision.

Idi sublien ni Supnet ti motorsiklona, awanen daytoy iti nangiparkinganna.

Impaiman ti polis ti Sto. Domingo nga indauluan ni Police Chief Inspector Honesto Lazo, COP, dagiti suspek iti police station ditoy siudad para iti pannakaisaklang iti kasoda.

Naammuan a mabirbirok pay ti maysa a Mardy Boy Tabrilla Tosoro, 16, baro, ken residente iti Poblacion, Sto. Domingo a mapapati a kadua da Reotutar ken ni Lazo iti panagtakawan iti motorsiklo.

Segun iti polis, modus operandi dagiti suspetsa ti agtakaw iti motorsiklo sada satsaten dagiti nadumaduma a pasetna

Kabayatanna, sabali manen a kaso ti panagtakaw iti motorsiklo ti naireport iti police station ti Vigan City.

Nagpulong iti polis ni Roy Valencia y Laurente, 25, naasawaan, ken residente iti Barangay Quimmarayan, Bantay, Ilocos Sur a natakaw ti asul a Honda XRM 125 nga imparkingna iti parking area ti Gabriela Silang General Hospital iti Barangay Tamag idi agarup 7:00 ti sardam ti Abril 10.

Napan binantayan ni Valencia ti asawana a nagganak iti nasao nga ospital.

Naduktalan laengen ni Valencia nga awanen ti motorsiklo iti nangiparkinganna iti kabigatanna.

Kinuna ti biktima a tultulodanna pay laeng ti nasao a motorsiklo isu nga adda pay la iti nagan ti amona a ni Prescila Bautista Orio, residente iti Barangay Cabalangegan.

Nupay nangipatulod ti polis-Vigan iti flash alarm kadagiti kabangibangna a police station, negatibo ti resultana.

Iti pannakaisurat daytoy, di pay nabigbig no asino dagiti nangitaray iti motorsiklo ni Valencia.#.#