2 kinettelda ti biagda babaen ti panagbekkel

SANTIAGO, Ilocos Sur – Apagtapog pay la ti tawen, duan ti naireport a nangkettel ti biagda babaen ti panagbekkel sadiay Magsingal ken ditoy nga ili idi Enero 7 ken 10.

Sadiay Magsingal, naireport a nagbekkel ni Lilibeth Olivas y Hernandez, 16, balasang, estudiante iti Manzante National High School ken residente iti Barangay Dacutan, babaen ti panangibitinna ti bagina iti sanga ti mangga.

Nasukalan ni Gilbert, adingen ni Lilibeth, ti kabsatna a nakabitin babaen ti nylon cord a naigalut iti sanga ti mangga iti likudan ti balayda idi agarup alas 6:00 ti Enero 7.

Nalamiis ken nasikkilen ti biktima idi makita ni Gilbert.

Mapapati a maysa a suicide note ti nadiskubre iti bulsa ni Lilibeth.

Addan iti ikut ti polis ti nasao a surat.

Mapapati a naungtan ti balasang gapu iti kaaddan ti kaayan-ayatna.

Kabayatanna, maysa a mannalon ti nangibitin iti bagina sadiay Barangay Mambug, ditoy nga ili idi Enero 10.

Iti report a dimmanon iti polis ditoy, naduktalan ni Emily Aguiner y Garnace ni Victor Sabado y Edeleon, 19, naasawaan, mannalon, ken residente iti nadakamat a barangay, a nagbekkel iti uneg ti balayda babaen ti nylon cord,

Nagpaarayat daytoy iti di nainaganan nga ulitegna ket intarayda ni Victor iti rural health unit ditoy ngem indeklara ti nangatendar kenkuana a doktor nga awanen ti biagna.

Problema iti pamilia ti mapapati a nangkettelan ti biktima ti biagna.#