Footer

2 konsehal, inkalinteganda lakbay-aral iti Boracay

VIGAN CITY – Mindoro Beach, mapagbalin a kas iti agdindinamag a Boracay?

 

Dua a konsehal ti nangibatad babaen ti privilege speech a kasungani dagiti pammabalaw a nasagrapda iti ipapanda panaglakbay-aral iti Boracay, adu ti naadalda iti nasao a lugar a mabalinda nga iyaplikar a mamagbalin ti Mindoro Beach a Boracay of the North.

Kinuna ni Konsehal Audie Agdamag, chairman ti committee on environment,  a dakkel ti naadalna iti ipapanda iti Boracay ti maipanggep iti segregation system ken ti nasayaat a pannakamanehar  daytoy,  kangrunaan a rason no apay a nagun-od daytoy a lugar  ti  2007 National Award para iti  Best Segregation.

Kinuna met ni Konsehal Benjo Verzoza a pinilina ti napan iti Boracay ta dakkel ti pammatina nga ad-adu ti maadalna sadiay ngem iti tumabuno iti konbension ti Philippine Councilor’s League a kaadduanna a mapanda laeng agpaspasiar  ken  ag-shopping iti mall.

Kadua da Verzosa ken Agdamag a napan iti Boracay da  Konsehal Everin Molina, Andres Adriatico, Hermenigildo Apelin, Loreto Quibilan, Maximo Alves, ABC Federated President Jhon Patrick Singson ken SP Secretary Jayson Avila.

Inkalintegan ni Verzosa a trabaho ti inatupagda iti kaaddda iti Boracay, saan a napan naggasto ken nagragragsak ket kas pammaneknek, impresentarna babaen ti power point presentation dagiti lugar a napnapananda. tapno malawlawagan ti panunot dagiti nangbabalaw nga awan ti kaes-eskan dayta a panaglakbay-aralda.

Segun iti konsehal, napanda nagsukisok iti municipal hall ti Kalibo, Aklan no ania dagiti paglintegan a maipatpatungpal iti Boracay mainaig iti materials recovery facilities, transportasion, ken livelihood ket nagaramidda ti inputs ken  proposed resolution para iti pannakapasayaat ti Mindoro Beach kas iti panagkiddaw iti Provincial Agriculture Office iti 500 coconut seedlings a maimula iti aglawlaw iti Mindoro Beach, pannakaaramid ti banana boat, ken dadduma pay a banag a maiyasping iti buya ti Boracay.

Kabayatanna, linawlawagan ni Konsehal Quibilan a saan a kagudua milion ti nagastoda iti ipapanda iti Boracay no di P12,500 laeng tunggal maysa kadakuada ket karaman ditan ti alawans, akomodasion ken plete.

Indawat pay ni Versoza iti panaglakbay-aral met iti Boracay dagiti barangay captains ti 9 a poblacion ditoy, ti CENRO officer ken dua a kameng ti media tapno mapanda agobserba ken agadal iti mabalinda nga iyaplikar iti Mindoro Beach. (Nemia Icari)