2 kotse nagdinnungpar, 6 nadunor

SINAIT, Ilocos Sur – Dua a kotse ti nainbolbar iti aksidente iti national highway iti paset ti Barangay Calanutian ditoy nga ili a nakadundunoran dagiti nagmaneho ken pasaheroda idi rabii ti Disiembre 5.

Naitaray iti Sinait District Hospital ti drayber ti Toyota Vios a ni Jayson Pornobe y Evangelista, 24, ken residente iti 222 Isla Road, Zone V Isla, Valenzuela City, ken  dagiti okupante iti kotse a da Jose Lumang, Jr., 60; Aurora Lumang, 57;  ken Dr. Christianne Salvador, 31, agpapada a residente iti Barangay Caunnayan, Batac City,   idinto nga iti Suero General Hospital, Cabugao, Ilocos Sur da Rodante Fieldad y Pilar, 38, naasawaan, drayber ti Toyota Land Cruiser, ken residente iti Barangay San Julian Sur, Vigan City, ken ti kaduana a ni Roderick Balino y Camlo, 32, naasawaan, ken residente iti Sitio Victory, Barangay Calangcuasan, Salcedo, Ilocos Sur.

Iti inisial nga inbestigasion dagiti polis, agpaabagatan a direksion  iti national highway ti Barangay Calanutian, Sinait ti Toyota Land Cruiser idi mapapati a saan a nakontrol ni Fieldad ti manibela ket nagpakannigid ti lugan a puon ti pannakadungparna ti makasabatna a Toyota Vios.

Gapu iti daytoy, naiduron ti Toyota Vios iti dayaen nga abaga ti kalsada a sumango iti amianan a laud a direksion ken nakaipitan ni Pornobe iti driver’s seat ken nakadunoran dagiti sabali pay nga okupante ti lugan.

Inakkal dagiti nagresponde a polis-Sinait, personnel ti Sinait District Hospital ken dadduma pay nga immarayat ti drayber ken dagiti okupante ti kotse sada intaray iti Sinait District Hospital. Naiyalis dagitoy iti Mariano Marcos Memorial Hospital, Batac City para iti ad-adda pay a pannakatamingda.

Naitaray met iti Suero General Hospital da Fielda a nagsagrap iti dunor iti akimbaba a bibigna ken ni Balino a nagarumiadan ti ulona.

Nakaro ti dadael ti sungo dagiti dua a lugan.#