2 kustomer, napabasol a nagtakaw

STO. DOMINGO, Ilocos Sur – Inreport ti maysa a negosiante iti polis ditoy ti dua a kustomer a mapapati a nangtakaw ti kuartana a nakadulin iti alud ti lamisaanna idi aldaw ti Abril 24.

Iti reportna, pinabasol ni Teresita Esguerra y Tabunan, 54, negosiante, ken residente iti Vacunero, ditoy nga ili, da Jonalyn Dasalla, 37, naasawaan, residente iti Barangay Poro, Magsingal, ken ni Lucrecia Purisima, 78, balo, taga-Poblacion ditoy nga ili, a nangtakaw iti P21,000.00 a kuartana a naikabil iti alud ti lamisaanna.

Segun iti report, napan nagroseria dagiti dua iti tienda ti biktima ket idi nakapanawda, naduktalan laengen ni Esguerra nga awanen ti kuartana iti nakaikabilanna.

Ngem idi kinumpronta dagiti polis dagiti dua iti puestoda iti uneg met laeng ti tiendaan, pinaglibakan dagitoy ti ipabpabasol ni Esguerra kadakuada.#