2 lalaki, ginandatda a tarayan ti billda iti videoke bar

CANDON CITY – Saan a nakalusot ti dua a lalaki a mangtaray iti bayadanda iti videoke bar a naginumanda ket ti makadakes, nasukalan iti ikut ti maysa kadagiti suspek ti maysa a paltog.

Segun iti report, naginom da Celito Calindas, 24, ken residente iti Barangay Bagani Gabor ditoy siudad, ken ti kaduana a nainaganan Michael Bustamante iti MJ Videoke Bar sada ginandat a tarayan ti bayadanda ngem kinamat ida ti waiter ken ti security guard.

Idi maipiskot dagiti suspek, mapapati nga inuksot ni Calindas ti paltogna ngem impuruakna iti karuotan idi simmangpet dagiti nagresponde a polis.

Narekobre dagiti polis ti paltog a cal. 357 ken nagkarga iti lima a bala.

Naipan dagiti suspek iti police station para iti naan-anay nga inbestigasion.#