Footer

2 lalaki, ginudas armado a tattao

BANTAY, Ilocos Sur – Iti baet ti kampania ti kapolisan maikontra iti loose firearms iti probinsia, dua a lalaki ti nagudas iti nagsina a pammapatay iti Magsingal ken ditoy nga ili.

Napapatay da Restituto Laurente, 53, naasawaan, mannalon, residente iti Quimmarayan ditoy ken ni Rodel Veracion, 24, residente iti Panay Norte, Magsingal babaen dagiti di pay am-ammo a tattao.

Segun iti report manipud iti polis ditoy, matmaturog ni Laurente iti salas idi paltogan ti di pay am-ammo a tao a puon iti nakatayanna a sigida.

Nagsagaba ti biktima iti sugat iti boksitna a gapuanan ti gauge 12 shotgun.

Segun pay iti inbestigasion, nakariing ni Vigilio, kabsat ti biktima, idi makangeg iti putok ket naduktalanna a nadigosen ti kabsatna iti bukodna a dara.

Kabayatanna, natay ni Veracion iti ospital a nakaitarayanna kalpasan a pinaltogan ti di pay nabigbig a tao.

Naammuan iti inbestigasion ti PNP Magsingal a sakbay ti pammapatay, napan nakiinom ti biktima iti kaarrubada nga adda iti asideg ti pagtaenganna.

Idi agawid ti biktima ket sakayanna koman ti motorsiklona, immasideg ti armado a tao sana pinaltogan ti biktima.

Naitaray ti biktima iti Tolentino Clinic and Hospital sa naiyalis iti Metro Vigan Cooperative Hospital ngem saanen a naalaw dagiti doktor ti biagna gapu iti nakaro a sugatna iti barukong ken takiag.

Nakarekobre dagiti polis iti dua a buli manipud iti homemade shotgun iti nakaaramidan ti krimen. #