CANDON CITY – Iti laksid ti nainget a kampania ti kapolisan ditoy maikontra iti agraira a paltog, adda latta dagiti di mangitaltalek ket agisabbikelda iti armasda uray iti ipapanda kadagiti paginuman wenno videoke bars.
Idi rabii ti Nobiembre 24, maysa manen a nakaarmas a lalaki ti inaresto dagiti polis gapu ta dina kayat a bayadan dagiti nainomna.
Kanaig daytoy, nakasuan iti panaglabsing iti RA 8294 ti suspek a ni Reynaldo Saura Jr. y Gadiaza, 51, naasawaan ken residente iti Barangay Langlangca 2nd, Candon City.
Nagpulong ni Demetrio Valdez y Galutan, 36, naasawaan, security guard ti Jovel’s KTV, ken residente iti Barangay Allangigan 2nd kadagiti nagrekorida a polis a dua a kustomerda ti saan a nagbayad iti nainomda ken adda sabbikel ti maysa a paltog.
Rinikisa dagiti polis dagiti suspek ket nakumpiskada iti ikut ni Saura ti maysa a Colt Cal. 38 a nagkarga iti uppat a bala ken maysa a kapsula.
Inaresto dagiti polis ni Saura idi awan ti maipakitana a lisensiana nga agikut iti paltog.
Kabayatanna, maysa met a lalaki ti inaresto dagiti polis ti Narvacan kalpasan a nakumpiskada iti ikut ti maysa a paltog idi rabii ti Nobiembre 27.
Nagresponde dagiti polis kalpasan a nakaawatda iti tawag ti telepono ti kaadda ti maysa a lalaki nga addaan armas a nasaripatpatan iti plasa idi agarup 9:40 ti rabii ti Nobiembre 27.
Nakakumpiska dagiti polis iti ikut ni Dan-dan Carta y Rodolfo, 30, mannalon ken residente iti Barangay Margaay, Narvacan iti Caliber 22 revolver nga addaan Serial No. 99961 ken nagkarga iti tallo a bala.
Awan ti naipakita ti suspek a dokumento a mangpaneknek nga addaan iti otoridad nga agikut iti nasao a paltog.
Naipan ti suspek iti police station para iti tumutop a disposision.#