2 lalaki, nagkurimes iti sensilio

VIGAN CITY – Karigat ti biag ket uray sensilio, kinurimes dagitoy dua a suspek ngem malasda ta nasalamaan ida ti watchman a nagtungpal iti pannakatiliwda.

Nabigbig dagiti suspek a da Ronnie Riveta Cuenta, 21, baro, ken maysa nga Ambo Ramos, agpada a residente iti Barangay VII, ditoy siudad.

Bayat ti panagiwayat ni Marlon Pantaleon y Reclusado, 31, baro, watchman iti inspeksion iti tiendaan publiko, nasalamaanna dagiti suspek iti ground floor a nagbitbit iti timba a nagkarga kadagiti sensilio.

Nagtaray dagiti suspek ngem kinamat ida ti watchman ken kakaduana ket naipiskotda ni Riveta. Nakalibas ni Ramos.

Mapapati a sinerrek dagiti suspek ti maysa nga stall iti second floor babaen ti panangdadaelda iti lock ti bassit a ridaw.#