2 lalaki nagprobokar ta di lakuan ida ti tindera

SANTIAGO, Ilocos Sur – Dua a lalaki a saanen a kayat a lakuan ti tindera iti maysa a hamburger stand ditoy ti nagprobokar a puon ti nakaireklamuanda iti polis.

Impulong ni Yolanda Caslao, 20, residente iti Dugong, Bucay, Abra, da Dominador Egar, 41, ken residente iti Imus, Cavite, ken ni Melchor Sabado, residente met iti barangay Ambucao, Santiago, Ilocos Sur, gapu iti panagpilit dagiti dua a lakuanna ida nupay awan pagbayadda.

Kas maibatay iti police blotter ditoy, nagorder da Egar ken Sabado iti dua a hamburger ken dua a softdrinks nga aggatad iti P83.00.

Idi agsingir ni Caslao, mapapati nga imbaga ni Sabado nga awan ti kuarta sana impasaruno nga utangenna.

Ni Egar ti nagbayad iti inorderda.

Mapapati a nagorder manen ti Sabado iti softdrinks ket nagkedked ni Caslao a mangted.

Mapapati a pinanggep ni Sabado a puersaran a luktan ti reprigeradura tapno mangiruar iti softdrinks ngem bimmallaet ni Jomar Pinera ket rimsua ti saanda a panagkinnaawatan.

Ditoy a nagibuong ni Egar iti bote iti sanguanan ti burger stand.

Iti panagsasangoda iti police station, dimmawat iti pammakawan dagiti dua. (Danny Antalan)