2 lalaki, nakumpiskaan iti di rehistrado a pestisidio

STA. CATALINA, Ilocos Sur – Ballaag kadagiti mannalon a dida gumatang iti insektisidio kadagiti agpaspasiar kadagiti barangay iti probinsia agsipud ta posible a saanda a rehistrado wenno peke dagitoy.

Itay nabiit, dua a lallaki ti tinengngel dagiti polis ditoy nga ili gapu ta nasukalan iti ikutda dagiti saan a rehistrado nga insektisidio.

Iti report manipud iti polis ditoy, natiliw da Richard Calleto y Hagad, 24, baro, residente iti Barangay Sapang, Sta. Lucia, Ilocos Sur ken Jackson Bag-ay Agsoy, 18, baro, residente iti Barangay Baliclic, Sta. Lucia gapu ta nasukalan iti ikutda ti 14 a plastik a botelia (250ml) ti Oneclick insecticide ken 9 a plastik a botelia a sagtunggal maysa a litro ti Super Guano Foliar Fertilizer (20-20-40).

Mapattapatta nga agbalor amin dagiti mapapati a peke nga insektisidio iti P9,000.00.

Sakbay daytoy, idi agarup 9:30 ti bigat ti Enero 29, pinasardeng dagiti polis a nagisayangkat iti checkpoint iti sanguanan ti Police Community Precinct sadiay Barangay Pangada, ditoy nga ili, dagiti lugan dagiti suspek agsipud iti panaglabsingda iti ordinansa ti munisipio gapu ta naungor dagiti luganda.

Mapapati nga awan ti functional silencer wenno muffler ti Honda TMX 125 ken Honda TMX 155 dagitoy.

Kabayatan ti panangkita dagiti polis kadagiti dokumento dagiti lugan, sinaludsod ni SPO4 Christopher Bueno no ania ti naggian iti backpack a awit dagiti dua.

Insungbat dagiti suspek nga insektisidio dagitoy nga ideliberda iti Barangay Sinabaan, Sta. Catalina ket boluntario a linuktanda dagiti bag sada impakita dagiti linaonda.

Natukay ti suspetsa dagiti polis idi makitada a nakusnaw ti label a naipigket kadagiti plastik a botelia ket pinakaammuanda ti hepe ti polis ket inreport met daytoy ken ni Municipal Agriculture Officer Nerio Recaido.

Pinakaammuan ni Recaido ni Provincial Fertilizer and Pesticide Authority Officer Reynaldo Segismundo ket sinukimatda dagiti produkto a nakaduktalanda a saan a nakarehistro dagitoy ken awan ti permit ti pannakaibiaheda manipud iti FPA.

Kinumpiska dagiti otoridad dagiti insektisidio sana impan dagiti suspek ken dagiti motorsiklo dagitoy iti police station para iti naing-inget pay a panagsaludsod ken disposion.

Iti pannakaisurat daytoy,  maisagsaganan ti kaso a panaglabsing iti Section 8, 9, ken 10 ti PD 1144 maikontra kadagiti dua a suspek.#