2 lalaki, nasarakan a napaltogan

STA. CRUZ, Ilocos Sur – Maysa a kitkitaen nga anggulo dagiti inbestigador iti pannakapapatay ti maysa a barangay tanod iti turod iti Sitio Barikir, Barangay Besalan ditoy nga ili no adda pannakainaigna iti maysa met laeng a pammapatay iti napalabas.

Segun iti linaon ti progress report mainaig iti pannakapapatay ni Bonifacio Valdez y Haduca, 43, naasawaan, barangay tanod ken residente iti nadakamat a barangay, maysa nga eye witness ti biktima iti kaso ti murder maikontra iti maysa a Dominador Habon y Habon, kalugaran met laeng ni Valdez.

Nupay kasta, saan a nadakamat iti report no suspetsa ti polis ni Habon iti pannakapapatay ti tanod.

Iti inbestigasion dagiti polis ditoy, idi agarup alas 3:00 ti malem ti Hunio 17, nagturong ni Valdez iti talonna, sumurok-kumurang a maysa a kilometro ti kaadayona manipud iti balayda.

Idi alas 5:30, sinurot ti anakna a ni Marlon Aquino y Valdez ken ni Ruel Soliven y Habon ket idi dida nadanon ti biktima iti talon, binirokda ket nakitada laengen a nadigos ti biktima iti bukodna a dara iti maysa a turod.

Naitaray ti biktima iti Sta. Lucia District Hospital ngem indeklara ti doktor a nangtaming kenkuana a natayen gapu kadagiti sinagrapna a sugat iti nadumaduma a paset ti bagina.

Iti panagimbestiga dagiti polis nga indauluan ni Police Inspector Roland dela Pena Naungayan iti crime scene, nakarekobreda iti maysa nga buli  ken maysa a kapsula manipud iti di pay ammo ti kalibrena a paltog.

Agtultuloy ti inbestigasion mainaig iti nasao a pammapatay.

Kabayatanna, naduktalan ti maysa nga ina ti barona a natayen iti uneg ti tiendada iti sanguanan ti balayda idi agsapa ti Hunio 21.

Inreport ni Pacita Asuncion Torres, naasawaan, residente iti Sitio Cabaroan, Barangay Cuancabal, Cabugao, Ilocos Sur a nasarakanna laengen nga awan ti biag ti anakna a ni Julius Asuncion Torres, 25, baro, a nakaidda iti papag iti uneg ti bakante a tiendada iti sanguanan ti pagtaenganda.

Nagsagrap ti biktima kadagiti dunor iti ulona.

Nakarekobre dagiti polis iti uneg ti tienda ti dua a kapsula ti cal .45 ket addadan iti ikut ti Cabugao police station.

Iti karabian sakbay ti pannakaduktal ti bangkayna, mapapati a prinobokar ti biktima dagiti kabbalayna ket tinagbatna pay ti amana a nakasugatan ti takiag daytoy.

Mapapati a maysa drug addict ti biktima ken saan a nalimbong ti panagpampanunot.

Di pay ammo ti motibo ti pammaltog.#