2 lalaki, nasiputan iti akto nga agtakaw

STO. DOMINGO, Ilocos SurNaimbag ta nasiput ti saleslady iti maysa a pagtagilakuan iti tiendaan publiko ditoy ket napaay dagiti dua a lalaki a nangitaray iti bag ti akinkukua a naglaon iti kuarta ken alahas, agraman dagiti groseria.

Natiliw dagiti polis ni Bernard Apostol y Angeles, 49, naasawaan, mannalon ken residente iti Balacok, Lingayen, Pangasinan ngem nakalibas ti kaduana a nabigbig a maysa nga Arnel Castro, residente iti Lawis, Labrador, Pangasinan.

Segun ken ni Jovelyn Torrano, saleslady, simrek dagiti dua iti Majorijay Variety Store a kukua ni Ricardita Tubon y Viloria, 67, naasawaan, negosiante, ken residente iti Barangay Napo, Magsingal, Ilocos Sur ket nagpammarangda a kustomer.

Gapu ta nakadungsa, di nasiputan ni Tubon a sinikuat dagiti dua ti bagna a naglaon iti P22,197.00 iti nadumaduma a denominasion, 2 a paris ti aritos nga agbalor iti sumurok kumurang P10,000.

Rummuar koman dagiti suspek iti pagtagilakuan agraman ti groseria nga agbalor iti P486 ngem nasiputan ida ni Torrano ket kinamatna dagitoy agingga ti narekobrena ti bag manipud ken ni Apostol.

Naipan ni Apostol iti police station para iti kanayonan a pannakaimbestigana.#