2 lalaki, natiliw bayat panagpapustada iti hueteng

NARVACAN, Ilocos Sur -Makadanon payen ditoy nga ili dagiti agpapusta iti hueteng manipud Abra, daytoy ti napatalgedan dagiti polis kalpasan ti pannakatiliw dagiti dua a lalaki bayat ti panagkolektada iti pusta iti hueteng iti Barangay Lungog itay nabiit.

Iti report manipud iti police station ditoy, natiliw idi malem ti Abril 11 bayat ti panagpapustada iti hueteng, maysa nga illegal numbers game, da Jose Domingo y Lara, 55, residente iti Brgy. Pantoc, San Quintin, Abra ken Jason Antonio y Nepales, 21 yrs old, ken residente iti Barangay Cosili West, Bangued, Abra.

Nakumpiska iti ikut dagiti dua dagiti papelitos a nakaisuratan dagiti kombinasion dagiti numero a nakailanadan dagiti pusta; pusta nga agdagup iti P2,800.00; ken dua a bolpen.

Natiliw dagiti dua a suspek bayat iti akto a panagkolektada kadagiti pusta nga aramatda dagiti papelitos ti Vista Merieden.

Mapapati a mairemit dagiti pusta iti Bangued, Abra ngem saan a nailanad no sadino ti pakabolaanna.

Iti naudi a report, naipilan ti kaso nga illegal gambling maikontra kada Domingo ken Antonio iti sanguanan ti Provincial Prosecutor’s Office iti Vigan City a nai-docket iti babaen ti NPS No. I-03-INV-14D-00203.#