2 lalaki, natiliw nga agikut iti paltog, naipilaan iti kaso

STO. DOMINGO, Ilocos Sur – Napilaan iti kaso a panaglabsing iti PD 1866 dagiti dua a lalaki a natiliwan nga agikut iti paltog iti insayangkat dagiti polis ditoy nga Operation Oplan Bakal itay nabiit.

Napilaan iti kaso da Hernani Torina y Villegas, 30, addaan asawa, ken ni Alexander Valdez y Ballesteros, 59, addaan asawa, agpada a residente iti Barangay Padu Grande iti daytoy nga ili.

Naapput dagiti dua nga adda ikutda nga armas bayat ti panaginumda iti Jeje Videoke Bar iti Barangay Calay-ab ditoy nga ili.

Natiliw iti ikut ni Torina ti maysa a pistol caliber 9mm Llama, serial number 07-04-00775-96 nga addaan maysa a magasin a nakargaan kadagiti bala idinto a calibre 38 Smith and Wesson, addaan SN 77311 ken 3 a bala ti nakumpiska ken ni Valdeza.#