2 lalaki riding in tandem, ginandatda gudasen balo

SINAIT, Ilocos Sur – Nagandat ti biag ti maysa a balo bayat ti panagdaliasatna iti national highway a sakup ti Barangay Sta. Cruz, ditoy nga ili idi Mayo 27.

Nabigbig ti biktima a ni Rosalinda Yacapin y Nacnac, 38, agtagtagibalay, agdama a residente iti nadakamat a barangay.

Saan pay a nabigbig dagiti nangpaltog kenkuana a nagkalubbon iti motorsiklo.

Iti inisial a panagimbestiga dagiti polis, aggawiden ni Yacapin a nakalugan iti Suzuki Raider ket agdaldaliasat iti nadakamat a lugar idi mapapati a kinamat dagiti suspek a naglugan iti Honda TMX motorcycle ket maysa kadagitoy ti nangpaltog iti sumagmamano a daras iti biktima a nakaigapuan ti pannakaikras ti lugan daytoy.

Nagsagrap ni Yacapin iti uppat a sugat iti makannigid a paset ti likudna ket naitaray iti Sto. Cristo Milagroso Hospital ditoy nga ili sa naiyalis iti Mariano Marcos Memorial Hospital iti Batac City, Ilocos Norte.

Naglibas a nagpaamianan dagiti suspek kalpasan ti pam-maltog.

Naburak ti headlight ti lugan ti biktima, nakillo ti makan-nawan a foot rest ken natiruan iti dua a bala ti tugawna.

Nakarekobre dagiti nagresponde a polis iti tallo a kapsula manipud iti cal. 45 iti nakapasamakan ti krimen.

Nangipatulod dagiti polis iti flash alarm kadagiti kabangi-bang nga ili idinto a nangiwayatda iti pursuit operation ngem saandan a nasapulan pay dagiti suspek.

Saan pay nga ammo ti motibo ti pammaltog.

Kabayatanna, naipila ti kaso a frustrated homicide iti provincial prosecutor’s office, Candon City maikontra ken ni Jovencio Toquero y Gabuat, 58, mannalon, gapu iti panang-gandatna iti biag ni Wilfredo Gamata y Mendoza, 56, man-nalon idi rabii ti Mayo 21.

Naisuko metten iti otoridad ti Arminius Cal. 22 Magnum a paltog nga inaramat ti suspek iti pammaltog babaen ti maysa a kabagian daytoy.

Mapapati a narekobre ti dina kayat agpabigbig a kabagian ti suspek ti nasao a paltog a nagkarga iti dua a kapsula ken 2 rounds ti bala iti cylinderna sumagmamano a metro ti kaadayona manipud iti welding shop ti suspek.

Iti sabali a damag, babaen ti naun-uneg a panagimbestiga dagiti polis-San Juan nga indauluan ni Senior Inspector Edgardo Tabin Medrano ken babaen ti pannakikammayet ti Keen Investigation Monitoring Action Team (KIMAT) ken dagiti barangay officials ken tanod, nabigbigen ti suspek a nangpaltog iti maysa a laborer sadiay Barangay Bacsil, idi rabii ti Mayo 26.

Mapapati a natulnog a simmuko ni Wendell Asuncion y Inez, 34, mannalon, idi mapan arestaren dagiti polis.

Maipalagip a pinaltogan ni Asuncion ti maysa nga agnagan Joseph Alimodian y Molina, 28, naasawaan, trabahador, ken residente met laeng iti nadakamat a barangay.

Adda metten ti suspek iti kustodia ti police station para iti umisu a disposision.#