2 magmagna, dinungpar ti motorsiklo

SANTIAGO, Ilocos Sur -Dua a lalaki a magmagna iti igid ti kalsada ti dinungpar ti motorsiklo idiay Barangay Sabangan ditoy nga ili a puon ti nakadundunoranda.

Nainaganan dagiti biktima a da Robert Campilla ken Ceasar Garcia, agpada a residente iti nasao a lugar ken ti nangdungpar kadakuada a ni Edwin Ganado, kalugaranda met laeng.

Iti inisial nga inbestigasion, magmagna dagiti dua iti igid ti kalsada idi aksidente a dungparen ida ti motorsiklo a Well 125, addaan plaka a OP-8041 a minaneho ni Ganado.

Nagsagaba dagiti biktima iti sugat iti nadumaduma a paset iti bagida ket naitarayda iti ospital.#