2 mangngalap, mapukpukaw

CANDON CITY –  Dua a mangngalap ti naireport a mapukpukaw manipud idi timmapogda a mapan agkalap iti baybay idi Marso 27.

Mabirbirok pay da Federico Barnachea, Jr., 49, ken Jerry Fabros, 28, residente iti Barangay Darapidap ditoy siudad.

Naireport a napan dagiti dua nagala iti posit iti kabaybayan iti tengnga ti aldaw ti Marso 27 ngem dida metten nagsubli.

Sakbayna, naireport a mapukpukaw ni Jun Santiago, residente iti Barangay Paypayad, Candon City a nagpataaw  tapno mapan agkalap idi Marso 24.

Nupay kasta, nasarakan ti coastguard ni Santiago nga agkatangkatang iti Luna, La Union tallo nga aldaw kalpasanna.#