2 mangngalap, naalaw iti kabaybayan

MAGSINGAL, Ilocos Sur – Nakurang a dua nga aldaw a nagkatangkatang dagitoy dua a mangngalap iti baybay sakbay a naalawda idi agsapa ti Hulio 13 sadiay Barangay Puro ditoy nga ili.

Mismo a ni Barangay Puro Barangay Puro, Magsingal Angelito Torricer, 55, ti nangipaima iti kapolisan kadagiti naalaw a mangngalap a nabigbig a da Jessie Angala y Abello, 25, baro, ken ni Marlon Angala y Abello, 35, naasawaan, agpada a residente iti Brgy. Mantanas, Sta Cruz, Ilocos Sur.

Naalaw dagiti mangngalap a taga-Puro dagiti biktima iti kabaybayan a sakup ti nasao a barangay idi agarup 5:00 ti agsapa ti Hulio 13.

Iti panagimbestiga dagiti polis, nga idi agarup 4:00 ti agsapa ti Hulio 11, timmapog dagiti dua a mangngalap ket idi agarup 24 a kilometro manipud iti shoreline, nadadaelan ti demotor a bilogda a nagmarka iti Diana Kate gapu iti dadakkel a dalluyon.

Segun kadagiti biktima, bayat ti panagkatangkatangda iti kabaybayan, dida intulok a makapaluspos ti kapetda iti nadadael a bilogda.

Kalpasan ti pannakaalawda, naipan dagiti dua iti Magsingal District Hospital para iti pannakatamingda.#