2 mangngalap, nakasuan iti illegal a panagkalap

STA. MARIA, Ilocos Sur – Dua a mangngalap ti nasaklangan iti illegal a panagkalap iti opisina ti assistant provincial prosecutor’s office iti Narvacan, Ilocos Sur kalpasan a natiliwanda a nagaramat iti compressor iti fish sanctuary a masarakan iti Sitio Balangen, Barangay Suso ditoy nga ili idi agsapa ti Hunio 3, 2012.

Nainaganan dagiti akusado a da Bobby Daproza, 44, naasawaan, ken Joey Cruz y Defiesta, 31, naasawaan, agpada a residente iti Barangay Lingsat ditoy met laeng nga ili.

Nagresponde dagiti  polis babaen ti panangidaulo ni OCI PSI Reynaldo C. Mendoza, Jr., kaduada ni Charry Canaoay, Municipal Fisheries Aquatic Resources Management Council chairman,  kalpasan a nakaawatda iti report nga adda nasiiman ti maysa  a residente iti nadakamat a barangay nga agkalkalap iti fish sanctuary a sakup ti nasao a sitio.

Kinumpiska dagiti polis dagiti dua a bangka dagiti suspek a namarkaan iti John Mark ken A-J nga addaan compressor, dagiti nadumaduma nga ikan ken shells nga agdagsen amin iti aganay 13 kilos sada impan dagitoy iti police station para iti dokumentasion ken maitutop a disposision.#