2 mangngalap natiliw nga agkalkalap iti fish sanctuary

TAGUDIN, Ilocos Sur – Dua a mangngalap ti naibalud gapu iti pannakatiliwda a nagkalap iti maiparparit a paset ti kabaybayan ti Barangay Libtong ditoy nga ili idi parbangon ti Septiembre 23.

Nabigbig dagiti mangngalap a da Cristobal Espirito y Moster, 45, naasawaan, ken Daniel Madrid y Moster, 14, agpada a residente iti Barangay, Bangar, La Union.

Naammuan nga idi agarup alas 3:00 ti parbangon ti nadakamat nga aldaw, nakita da Reymundo Lazo, presidente ti Tagudin Fish Sanctuary ti Barangay Libtong, ken ti kaduana a ni Robert Luancin ti maysa a maris duyaw a bangka iti asideg ti naideklara a fish sanctuary isu nga immasidegda.

Nakitada dagti suspek nga agkalkalap iti maiparparit a lugar ket addan nakalapanda a nadumaduma nga ikan nga agdagsen iti sumurok kumurang 6.5 kilos.

Naipaima dagiti suspek iti Tagudin Municipal Police Station idinto a naikustodia ken ni Lazo ti Briggs and Stratton 16 horse power.#