2 mannalon nagbinnagsol gapu iti dati a susik

SAN ESTEBAN, Ilocos Sur – Agpada a naiyospital ti dua a mannalon kalpasan a nagbinnagsolda iti pagpastoran sadiay Barangay Cabaroan ditoy nga ili idi malem ti Oktubre 19.

Naipaagas iti Central Ilocos Sur District Hospital ni Jener Tebia y Escohido, 35, naasawaan, mannalon; idinto a naitaray iti Candon General Hospital ni Jerry Natividad y Omanito, 44, mannalon.

Narekobre dagiti nagresponde a polis ti maysa nga imuko ken kumpay nga inaramat dagiti dua iti panagbinnagsolda.

Iti panagimbestiga dagiti polis, bayat ti panangipastor ni Tebia kadagiti kaldingna idi agarup 3:00 ti malem ti nadakamat a petsa, mapapati nga immasideg ni Natividad ket kinumprontana ti immuna mainaig iti dati a susikda iti kallabes.

Mapapati a dimmarup ni Natividad sana binagsol ni Tebia babaen iti imuko ken kumpay.

Iti panaggabbalda, naagaw ni Tebia ti imuko ket daytoy ti imbagsolna iti tian ni Natividad.

Agtultuloy ti panagimbestiga dagiti polis mainaig iti nasao a pammagsol.#