2 mannalon, natagbat, nabagsol gapu iti arak

SAN JUAN, Ilocos Sur – Dua a mannalon ti biktima iti nagsina nga insidente ti pannagbat ken pammagsol babaen dagiti kabsatda nga adda iti babaen ti inpluensia ti arak.

Idi agarup 9:00 ti rabii ti Oktubre 23, tinagbat ni Michael Guzman y Ventura, 28, baro, residente iti Barangay Barbar, San Juan, Ilocos Sur, ti kabsatna a ni Ronaldo Guzman y Ventura, 35, baro, a puon ti nakayospitalan ti biktima.

Segun iti police blotter, agin-inana ni Ronaldo iti balkonaheda idi simmangpet iti balayda ni Michael a nabartek ket iti awan a rason, kellaat a tinagbatna iti namindua a beses ti kabsatna a nakasugatan ti makannigid ken makannawan nga ima daytoy.

Naitaray ti biktima iti Pira Hospital, Cabugao, Ilocos Sur para iti pannakaagasna idinto a simmuko ti suspek iti otoridad.

Saan a nabirokan dagiti polis ti bolo a pinangtagbat ni Michael iti kabsatna.

Mapapati a dati a susik ti ramut ti pannagbat a pinakaro ti pannakabartek ti suspek.

Kabayatanna, nabartek met ni Meldwin Paguirigan y Ipac, 21, baro, idi binagsol ni Meynard Paguirigan y Ipac, 27, naasawaan, ken residente iti Barangay Quibit-quibit, Sinait, Ilocos Sur.

Segun iti polis, agin-inana ni Meynard iti sango ti balayda idi simmangpet iti agarup 7:30 ti sardam ti Oktubre 25 ni Meldwin a nabartek sa nagkariar.

Pinagtalna ni Meynard ti kabsatna ngem nagresulta laeng iti nabara a panagsubangda a nagtungpal iti panangbagsol ti suspek iti kabsatna a nakatiruan ti bukot daytoy.

Naitaray ni Meldwin iti Corpuz Clinic and Hospital sa naiyalis iti Mariano Marcos Memorial Hospital and Training Center, Batac City.

Boluntario met a simmuko ti suspek ken ni Barangay Captain Nick Yadao. Insuko ti barangay captain ti suspek kadagiti polis.

Saan a narekobre ti naaramat iti pammagsol.#