Footer

2 mannalon, stay-in worker ti letson manok, natagtagbat gapu iti susik

STA. CATALINA, Ilocos Sur. – Tallo a lalaki ti nagbalin a biktima ti nagsina a pannagbat iti Burgos, Sta. Cruz ken ditoy nga ili itay nabiit.

Natagbat da Wilmer Corpuz, 30, stay-in worker ti MMM Lechon Manok and Liempo, taga-Dingras, Ilocos Norte; ni Urbano Dizon y Pimentel, 40, mannalon, naasawaan, residente iti Barangay Callitong, Burgos, Ilocos Sur ken ni Dante Andaquig y Cortez, 49, naasawaan, mannalon, residente iti Barangay Quinsoriano, Sta. Cruz, Ilocos Sur a mapapati a nagramut iti dati a susikda kadagiti suspek.

Segun iti report manipud iti polis ditoy nga ili, maturog koman ni Corpuz iti agarup ala una iti parbangon ti Hunio 30 iti naedda a balay iti Barangay Cabuloan, Sta. Catalina, Ilocos Sur idi mapapati a simrek ni Leo Daniel Salas, 21, baro, taga-Laoag City, katrabahuan ni Corpuz, sana tinagtagbat ti biktima a nakasugatan daytoy iti kannigid a sikona, ken kannawan a gurongna.

Naitaray ni Corpuz iti St. James Hospital idinto a naipaima ti suspek kadagiti polis para iti pannakapalutpotna.

Sakbay ti insidente, segun dagiti katrabahuan dagiti dua, nagsubang dagitoy idi addada iti dalanda nga aggawid ngem naanawada.

Kabayatanna, natagtagbat ni Dizon bayat ti panaginumda  iti kumparina iti pagtaengan daytoy agraman sumagmamano a di nainagan a kakaduada iti agarup alas 9:20 ti bigat ti Hunio 27.

Naammuan iti report nga immasideg lattan ni Buenaventura Lazaro, Jr., 76, balo, residente iti Barangay Callitong, Burgos, Ilocos Sur kadagiti aggiinum ket tinagtagbatna ni Dizon a nagsagrapan daytoy iti sugat iti kanawan a paset ti ulona ken kanawan nga abagana.

Naitaray ti biktima iti Judge Guerrero Hospital iti Santa Maria, Ilocos Sur idinto a boluntario a simmuko ti suspek iti polis ti Burgos, Ilocos Sur.

Saan a narekobre dagiti polis ti igam a naaramat iti pannagbat.

Dati a susik ti mapapati a motibo ti pannagbat.

Kabayatanna, ni Jose Santos Calanno y Jacobe, 80, naasawaan, mannalon, residente met laeng iti Barangay Quinsoriano ti mapapati a timmagbat ken ni Andaquig iti agarup 1:50 ti malem ti Hunio 26.

Segun iti report, napan inyawid ti biktima dagiti kaldingna ket idi aggawiden, inatake ti suspek a nakaiggem iti buneng. Timmaray ti biktima ngem naidaramudom ket tinagtagbaten ti suspek iti nadumaduma a paset ti bagina. Nabaelan ti biktima nga inagaw ti buneng manipud iti suspek sa timmaray.

Naitaray ti biktima iti Candon City Hospital para iti pannakaagas dagiti sugatna.#