2 mannibrong, naipiskot dagiti otoridad

MAGSINGAL, Ilocos Sur – Saan a nakalusot ti dua a mannibrong iti panangkamat kadakuada dagiti otoridad kalpasan a kinurimesda ti naglakuan ti maysa a pagtagilakuan sadiay Barangay San Basilio, ditoy nga ili idi bigat ti Abril 20.

Iti kaudian a report, naiyendorson iti opisina ti provincial prosecutor ti kaso a panagtakaw maikontra kada Michael Pipo y Evangelista, 37, naasawaan, ken Elmer Santos y Pipo, 24, naasawaan, ken agpada a residente iti Zone 1, Bantay, Ilocos Sur.

Maipalagip nga idi agarup 9:30 ti bigat ti nadakamat a petsa, simrek da Pipo ken Santos iti MJV Rice Supplier and General Merchandize ket nagpammarang ni Pipo a gumatang iti bagas.

Bayat ti panagpatang da Pipo ken ni Richelle Alvares y Villalon, 19, cashier, immasideg ni Santos iti lamisaan a nakaikabilan ti naglakuan a kuarta.

Madamdama, pimmanaw ni Santos, sa simmaruno ni Pipo nga awan met ti ginatangna.

Idi kitaen ti cashier ti naglakuanna iti drawer, awanen ti kuarta isu a nagpaarayat iti ruar ti pagtagilakuan.

Naawis ti imatang dagiti polis nga agpatpatrolia iti asideg ket kinamatda dagiti suspek agingga a naipiskotda dagitoy.

Narekobre iti ikut dagiti suspek ti P2,665.00 iti nadumaduma a denominasion a kinurimesda iti pagtagilakuan.#