2 masuspetsa a gun for hire, napaltogan, maysa ti natay

MAGSINGAL, Ilocos Sur – Dua a baro a mapapati a gun for hire ken nainbolbar iti droga ti napaltogan a puon ti dagus a nakatayan ti maysa ken nakasugatan ti kaduana idi agarup alas nuebe ti rabii ti Disiembre 12 iti Sitio Balbalino, Barangay Panay Norte ditoy nga ili.

Nagturong dagiti polis iti nadakamat a lugar kalpasan a nakaawatda iti report nga adda napasamak a shooting incident iti nadakamat a lugar.

Nadatngan dagiti polis nga awanen ti biag  ni Rodante Rosario Bael, 26, baro, residente iti nadakamat a lugar, iti abay ti maysa a Honda Wave a motorsiklo, maris nalabaga, addaan iti plate number a 6932AP.

Segun iti inisial nga inbestigasion dagiti polis, sakbay ti pammaltog, naggiinom da Rodante, Johnny Bael Quinto, 23, baro,  ken ni Rodelie Bael, barangay tanod a kabsat ni Rodante iti balay ti naudi.

Idi agarup 8:50 dayta a rabii, rimmuar dagiti biktima a naglugan iti motorsiklo ket bayat ti panagdaliasatda iti barangay road a sakup met laeng ti nadakamat a sitio, pinaltogan ida ti di pay ammo a tao a nagpuesto iti nasamek a paset iti igid ti dalan. Nagsagrap ni Bael iti sugat iti ulo ken bagina ket dagus a natay.

Intaray dagiti bumarangay ni Quinto iti Magsingal District Hospital tapno maagasan ti sugatna iti likud sa naiyalis iti Gabriela Silang General Hospital iti Vigan City.

Nakarekobre dagiti inbestigador iti tallo nga empty shells ken 5 a deformed slugs a naiputok manipud iti gauge 12 shotgun iti nakapasamakan ti krimen.

Kitkitaen dagiti polis no adda pannakainaig ti pammapatay iti mapapati a pannakainbolbar dagiti biktima iti aktibidad ti droga. Mapapati pay a gun for hire dagiti biktima.#