2 mediaman, No. 1 a nabutosan a konsehal

GALIMUYOD, Ilocos Sur -Dua a dati a kameng ti broadcast media ti nakagun-od iti kangatuan a butos para konsehal ti ilida itay kalkalpas a panagpipili.

Ni Kulapu Trinidad, dati a broadcaster manipud iti Bombo Radyo Vigan, ti nakagun-od iti kadakkelan a butos kadagiti amin a nagkandidato para konsehal iti Galimuyod iti daytoy panagsublina manen a konsehal kalpasan ti panaginana iti tallo a tawen.

Saan a nagkandidato ni Trinidad idi 2010 ta naturposna ti tallo a nagsasaganad a terminona a konsehal ditoy nga ili ket nagpaay a municipal administrator iti opisina ti mayor.

Nagun-od met ni Marvin Ong, dati a broadcaster iti DWRS ti kangatuan a butos iti daytoy a panagpailayonna a kas konsehal iti San Esteban.

Daytoy ti maudi a termino ni Ong.

Maysa ni Ong kadagiti ace reporters ti DWRS sakbay a timmapog iti politika.#