2 menor de edad, binallaibo dagiti dua lalaki

VIGAN CITY – Iti baet ti masansan a ballaag ti kapolisan a di panagtalek dagiti residente ditoy kadagiti umasideg kadakuada a ganggannaet a tattao, dua manen ti biniktima ti Salisi Gang idi malem ti Oktubre 5.

Nainaganan dagiti biktima a da Joji Miguel Cambay Aquino, 15, Grade 10, residente iti Brgy. III, Vigan City, Ilocos Sur ken ni Edgar Ramilo Dela Cruz, 14, Grade 8 ken residente iti Brgy. IX, Vigan City, Ilocos Sur.

Nagtalek dagiti dua a menor de edad a nangited iti selponda iti dua a lalaki kas kasukat iti coin purse a nakaikabilan kano ti dakkel a kantidad.

Iti report a dimmanon iti police station ditoy, bayat ti kaadda da Cambay ken Dela Cruz iti sanguanan ti SSS building, Barangay 1, ditoy siudad, inasitgan ida ti dua a lalaki a nagsalsaludsod kadakuada no mabirokanda a trabaho iti siudad.

Kas panangiladawan dagiti biktima, kalkalaingan ti pammagi ti maysa a nakaaruat ti t-shirt nga addaan logo nga ICRD 150 Years Humanitarian, gray long pants, nakasinelas, idinto a pangrapisen ti sabali, kulot ti buokna ken nakapantalon iti maong.

Kinuna dagiti biktima a naay-ayoda a nangited iti selponda kas kasukat iti coin purse nga imbaga dagiti suspek a naglaon iti P15,000.00.

Kalpasanna, imbaga dagiti suspek nga agsasarakda iti Jolibee iti abay ti tiendaan publiko.

Awan dagiti suspek idi makadanon dagiti biktima iti nasao nga establisimiento.

Iti luktanda ti coin purse, nasukalanda laengen a nagkarga iti nagettegetteng a newspaper.

Nagsawar dagiti polis iti siudad ngem awan a nasarakanda dagiti suspek.#