Footer

2 menor de edad, naisalakan iti prostitusion

CANDON CITY – Dua a menor de edad a babai ti naalaw manipud iti maysa a karinderia a mapapati a front iti prostitusion iti raid nga insayangkat dagiti pannakabagi ti linteg iti barangay San Antonio ditoy siudad itay nabiit.

Inaresto dagiti polis ni Uldarico Sayana, Jr. 24, manager ti Lutong Bahay ni Mang Rico Carinderia, ken residente ti nasao a barangay kalpasan a positibo nga agpapaay a GRO iti nasao a karinderia ti dua a menor de edad, ni May, 17, residente iti San Esteban, Ilocos Sur, ken ni Em-em, 16, residente iti Sta. Lucia, Ilocos Sur (agpada a parbo a nagan).

Naisayangkat ti raid nga indauluan ni Police Chief  Inspector Marlo Castillo, chief of police ditoy babaen ti pannakipaset ni Alma Gabor, Department of Social Welfare Development officer ti Candon.

Sakbay ti operasion, maysa a polis ti nagpammarang a kustomer ket mapapati a nakitulag ken ni Sayana para iti serbisio ni May.

Nagbayad ti nagpammarang a kustomer iti P1,500  ket kaduanan ti babai nga immuneg iti kuarto iti asideg ti counter.

Dagus metten a simrek dagiti polis sada inaresto ni Sayana.#