2 menor de edad nakasuan panagsalungasing RA 10591

STO. DOMINGO, Ilocos Sur – Nakasuan ti dua a menor de edad iti panaglabsing iti RA 10591 gapu iti mapapati a pannakasukalda a nagikut iti paltog sadiay Barangay Calay-ab ditoy nga ili idi agsapa ti Marso 6.

Naiyendorso iti opisina ti provincial prosecutor, Vigan City, ti kaso a panaglabsing iti RA 10591 maikontra kada Lito, 16, residente iti Barangay Cabigbigaan; ken Dominador, 15, residente iti Barangay Pangpangdan, Sto. Domingo (parbo  ti naganda agsipud ta menor de edadda) agpadpada a saanen nga agbasbasa  ket nai-docket babaen ti NPS# I-03-INQ-14C-00046.

Idi agarup 12:05 ti bigat ti nadakamat a petsa, bayat ti panagpatrolia dagiti polis iti Barangay Calay-ab, nasalamaanda dagiti suspek a masuspetsa ti garawda bayat ti pannagnada iti barangay road.

Mapapati nga adda imbato dagiti dua idi umasideg dagiti agpatpatrolia a polis.

Idi nagsukimat dagiti polis iti lugar, nakitada ti dua a cal. 38 revolver nga awanan markings a naikabil iti nangisit a leather holster nga addaan iti saggapat a bala iti cylinder.

Saan a nailanad iti blotter no apay nga adda dagiti dua iti nadakamat a lugar iti dayta a rabii.#