2 menor de edad, natiliw gapu iti panaglabsing iti curfew

CANDON CITY – Dua a menor de edad ti tiniliw dagiti polis gapu ta addada pay la nga agwalangwalang iti Barangay San Juan ditoy siudad idinto a parbangonen ti Mayo 1.

Nasalamaan dagiti polis ditoy nga indauluan ni Police Inspector Feliciano Galdonez babaen ti superbision n Police Supt. Marlo Aquino Castillo bayat ti panagpatroliada da Jonel Lozano y Gayadan, 16, ken residente iti Barangay Calumsing, San Emilio, Ilocos Sur; ken ni Renzo Reclusado y Bertud, 17, ken residente iti Barangay Poblacion Sur, Lidlidda, Ilocos Sur nga addada pay la nga agwalangwalang iti sanguanan ti San Juan de Sahagun Church idinto nga agarupen alas 2:00 ti parbangon.

Naipan dagiti dua iti police station ngem iti agarup alas 8:00 ti bigat iti nadakamat a petsa, naiyawat met laeng dagitoy kadagiti nagannak kadakuada kalpasan ti pammagbaga kadakuada ti duty WCPD PNCO.#