2 menor de edad, natiliwan a nagbitbit natakaw a kompiuter set

SUYO, Ilocos Sur – Menor de edad pay laeng dagitoy suspek, ngem natiliwanda a nagbitbit iti kompiuter a naireport a natakaw iti maysa a pagadalan ditoy nga ili idi agsapa ti Septiembre 17.

Kas maibatay iti report manipud iti polis ditoy, nabigbig dagiti dua a menor de edad a da Arnel Adawi y Pael, 15, Grade 9 iti Libtong Integrated School, Tagudin, Ilocos Sur, ken Johnny Ballan y Esteban, 15, Grade 8 iti Suyo National High School ken agpada a residente iti Dinwede West, Cervantes, Ilocos Sur.

Nakumpiska iti ikut dagiti suspek ti maysa nga Acer monitor; Asus CPU, Tornado keyboard, A4tech Mouse ken DTS Power regulator a mapapati a mapanda itukon nga ilako.

Agbalor ti complete computer set iti P10,000.00.
Positibo a binigbig ni Benjie Tibaldo Madayag, mangisursuro iti Suyo National High School a ti computer set a natakaw iti pagadalanda ti nakumpiska kada Adawi ken Ballan.

Sakbay daytoy, nagresponde dagiti polis idi nakaawatda iti radio call manipud ken ni Barangay Tanod Agustin Hernado a dua a lalaki ti nakita a nagbitbit iti kumpleto a set ti kompiuter sadiay Sitio Kayapa, Barangay Poblacion, Suyo idi agarup 9:20 ti bigat ti Septiembre 17.

Segun ken ni Charlie Rosqueta, guardia, nasukalanna a naikkat ti uppat a blades ti jalousie a tawa ti Administrative Office idi agarup 6:30 ti agsapa iti nadakamat a petsa isu nga impakaammona ken ni Prinsipal Romulo Quitevis a dagus met a nangireport iti insidente iti police station.

Iti inisial a panagimbestiga dagiti polis, inikkat dagiti suspek ti uppat a blades ti jalousie ti opisina ti Administrator ket daytoy ti simrekan ken rimmuaranda kalpasan ti panagtakawda.

Iti pannakaisurat daytoy, naikustodia dagiti suspek iti police station sakbay a maipaimada iti opisina ti MSWD ditoy nga ili.#