2 menor de edad, suspek iti panagtakaw

SAN JUAN, Ilocos Sur – Dua a menor de edad ti suspek a nagtakaw iti maysa a pagtaengan sadiay Barangay Cabanglutan ditoy a mapapati nga insayangkatda bayat ti kaawan dagiti biktima idi Nobiembre 3.

Inreport ni Ronald Tagorda y Padua, 41, naasawaan, seaman ken residente iti nadakamat a barangay, iti polis ditoy a natakawan ti balayda kadagiti assorted nga alahas nga agbalor iti sumurok kumurang P64,500.00.

Naduktalan da Tagorda ken ni baketna a ni Lita a natakawanda idi simmangpetda iti balayda iti 6:00 ti agsapa ti Nobiembre 3 ta nadadael metten ti door lock ti ruangan ket idi immunegda iti kuartoda, awanen ti jewelry box a naglaon kadagiti alahasda.

Iti follow-up investigation dagiti polis, dua a menor de edad ti limtuad a nagtakaw iti balayda.

Naipaiman dagiti suspek iti opisina ti MSWD para iti umisu nga ebaluasion ken disposision.#